ಪಶು ಹಾಲಿನ ಪಾನ: ತಾಯ್ತನಕ್ಕೆ ಅಪಮಾನ, ರೋಗಗಳಿಗೆ ಆಹ್ವಾನ

ಹಾಲಿನ ಬಗ್ಗೆ ಕೆಟ್ಟದ್ದನ್ನು ಹೇಳಿದರೆ ಒಪ್ಪುವವರ ಸಂಖ್ಯೆಯು ಅತಿ ವಿರಳ. ಮನುಷ್ಯನ ಜೀವನದೊಂದಿಗೆ ಬಹಳ ಭಾವನಾತ್ಮಕವಾಗಿ ಬೆರೆತಿರುವ 'ಆಹಾರ'ವೆಂದರೆ ಹಾಲು. ಹುಟ್ಟಿದ ಘಳಿಗೆಯಿಂದ ಕೊನೆಯ ತನಕ ಮನುಷ್ಯನು ಸೇವಿಸುವ 'ಆಹಾರ'ವೊಂದಿದ್ದರೆ ಅದು ಹಾಲೇ ಅಲ್ಲವೆ? ಶತ-ಶತಮಾನಗಳಿಂದ ಮನುಷ್ಯನು ಕುಡಿಯುತ್ತಿರುವ ಈ ಹಾಲು ಅಮೃತವಲ್ಲವೇ?

ಹೌದೆ?

ಹಾಲು ಒಂದು ಅತ್ಯುತ್ಕೃಷ್ಟವಾದ, ಸಂಪೂರ್ಣವಾದ ಆಹಾರ. ಖಂಡಿತವಾಗಿಯೂ ಹೌದು. ತಾಯಿಯ ಹಾಲು ಆಕೆಯ ಮಗುವಿನ ಪಾಲಿಗೆ ಅತ್ಯುತ್ಕೃಷ್ಟವಾದ, ಸಂಪೂರ್ಣವಾದ ಆಹಾರ.[Hamosh M, 1996] ಅಷ್ಟೆ. ಆಯಾ ಸಸ್ತನಿಯ ಹಾಲು ಅದರ ಸಂತಾನಕ್ಕಷ್ಟೇ ಸೀಮಿತವಾದ ವಿಶಿಷ್ಟ ಆಹಾರವೆನ್ನುವುದು ನಿಸರ್ಗದ ಸತ್ಯ.[Kradijan RK] ತನ್ನ ಮಗುವಿಗೆ ಹಾಲೂಡಿಸುವುದು ಹೇಗೆ ತಾಯಿಯ ಸೌಭಾಗ್ಯವೋ, ಅದನ್ನು ತಾಯಿಯಿಂದ ಪಡೆಯುವುದು ಆ ಮಗುವಿನ ಜನ್ಮಸಿದ್ಧವಾದ ಹಕ್ಕೂ ಹೌದು. ಹೇಗೆ ತಾಯಿಯೋರ್ವಳು ಅನ್ಯಳ ಮಗುವಿಗೆ ಹಾಲೂಡಿಸಲಾರಳೋ, ಹಾಗೆಯೇ ಬೇರೆ ಯಾವುದೇ ಹಾಲು ಮಗುವಿಗೆ ಆಹಾರವೂ ಅಲ್ಲ, ಮಗುವಿಗೆ (ಅಥವಾ ಮಗುವಾಗಿರದೆ ದೊಡ್ಡದಾಗಿ ಬೆಳೆದಿರುವವರಿಗೆ) ಅದರ ಅಗತ್ಯವೂ ಇಲ್ಲ. ಅನ್ಯ ಪ್ರಾಣಿಯ ಹಾಲನ್ನು ಕುಡಿಯುವುದೆಂದರೆ ತಾಯ್ತನಕ್ಕೆ ಮಾಡುವ ಅಪಮಾನವೆಂದೇ ಹೇಳಬಹುದು; ಬಹುಷಃ ಇದೇ ಕಾರಣಕ್ಕೆ ಬಹುತೇಕ ಮಕ್ಕಳು ಆಕಳ ಹಾಲನ್ನು ಇಷ್ಟಪಡುವುದಿಲ್ಲ ಮತ್ತು ಆಕಳ ಹಾಲನ್ನು ತಿರಸ್ಕರಿಸುವುದು ನಿಸರ್ಗಸಹಜವಾದ ಪ್ರತಿಕ್ರಿಯೆಯೇ ಆಗಿರಬಹುದು. ಹೆತ್ತು ಹಾಲೂಡಿಸಿದ ಅಮ್ಮನೊಬ್ಬಳು ನಮಗಿರುವಾಗ, ದನಗಳು ನಮ್ಮ 'ಮಾತೆ'ಯರಾಗುವುದೇಕೆ ಮತ್ತು ಹೇಗೆ?

ಇನ್ನೊಂದೆಡೆ, ಪಶುಗಳ ಹಾಲನ್ನು ಸೇವಿಸುವುದರಿಂದ ಹಲವು ತೊಂದರೆಗಳನ್ನು ಎದುರಿಸಬೇಕಾಗಬಹುದು. ಶೈಶವಾವಸ್ಥೆಯ ಬಳಿಕ ಹಾಲನ್ನು ಕುಡಿಯುವುದರಿಂದ ದೇಹಕ್ಕೆ ಅಗತ್ಯವಾದ ಎಲ್ಲಾ ಪೌಷ್ಟಿಕಾಂಶಗಳ ಪೂರೈಕೆಯಾಗುವುದಿಲ್ಲ. ಇನ್ನೊಂದೆಡೆ, ಹಾಲನ್ನು ಸೇವಿಸುತ್ತಿದ್ದೇವಲ್ಲಾ ಎಂಬ ಭ್ರಮೆಯಲ್ಲಿ ಇತರ ಆಹಾರಗಳ ಸೇವನೆಯು ಕಡಿತಗೊಂಡು ನ್ಯೂನಪೋಷಣೆಗೂ ಕಾರಣವಾಗಬಹುದು.[Palmer LF] ತಾಯಿಯ ಹಾಲನ್ನು ಕುಡಿಯುವ ವಯಸ್ಸು ಮೀರಿದಂತೆ, ನಮ್ಮ ಕರುಳಿನಲ್ಲಿ ಹಾಲನ್ನು ಜೀರ್ಣಿಸುವ ಸಾಮರ್ಥ್ಯವೂ ನಿಧಾನವಾಗಿ ಕಡಿಮೆಯಾಗುತ್ತದೆ, ಅದು ಪ್ರಕೃತಿ ನಿಯಮ.[Rees L] ನಮ್ಮ ದೇಹದಲ್ಲಿ ವಯಸ್ಸಿಗನುಗುಣವಾಗಿ ಉಂಟಾಗುವ ಹಲವಾರು ಬದಲಾವಣೆಗಳಲ್ಲಿ ಇದೂ ಒಂದು. ನಾವು ಬೆಳೆದಂತೆ, ಯಾವುದು ಅಗತ್ಯವೋ ಅದು ಮೂಡುತ್ತದೆ, ಯಾವುದರ ಅಗತ್ಯವು ಇನ್ನಿಲ್ಲವೋ, ಅದು ಕ್ಷೀಣಿಸಿ ಮಾಯವಾಗುತ್ತದೆ. ಕರುಳಿನಲ್ಲಿ ಹಾಲನ್ನು ಜೀರ್ಣಿಸುವ ಕಿಣ್ವಗಳೂ ವಯಸ್ಸಾದಂತೆ ದುರ್ಬಲಗೊಂಡು ಮರೆಯಾಗುತ್ತವೆ. ಹಾಗಿರುವಾಗ, ಹಾಲನ್ನು ಕುಡಿಯುವ ವಯಸ್ಸು ಮೀರಿದ ಬಳಿಕವೂ ಅದನ್ನು ಕುಡಿಯುತ್ತಿದ್ದರೆ, ಅದು ಸರಿಯಾಗಿ ಪಚನಗೊಳ್ಳದೆ, ಬೇಕಾದದ್ದು ಹೀರಲ್ಪಡದೆ, ಬೇಡವಾದದ್ದು ಹೀರಲ್ಪಡುವ ಸಾಧ್ಯತೆಗಳು ಸಾಕಷ್ಟು. ಹೀಗಾಗಿ, ಬೆಳೆಯುವ ಮಗುವಿಗೆ ತಾಯಿಯ ಹಾಲು ಅಮೃತವಾದರೆ, ವಯಸ್ಸಾದವರ ಪಾಲಿಗೆ ಪಶುವಿನ ಹಾಲು ಹಾಲಾಹಲವಾಗಬಹುದು.

ಹಾಗಂದೊಡನೆ, 'ಹಿರಿಯರೆಲ್ಲರೂ ಹಾಲನ್ನು ಯಥೇಷ್ಟವಾಗಿ ಕುಡಿಯುತ್ತಿರಲಿಲ್ಲವೇ?' ಎಂದು ಆಕ್ಷೇಪಿಸುವವರು ಬಹಳಷ್ಟಿದ್ದಾರೆ. ಆದರೆ ಇದು ನಿಜವೆ? ಮನುಷ್ಯನು ಆಕಳ ಹಾಲನ್ನು 'ಅನಾದಿ ಕಾಲದಿಂದಲೇ' ಕುಡಿಯುತ್ತಿರಲಿಲ್ಲ, ಅದರ ಬಳಕೆ ಆರಂಭಗೊಂಡದ್ದು ಸುಮಾರು ಏಳೆಂಟು ಸಾವಿರ ವರ್ಷಗಳ ಹಿಂದಷ್ಟೇ. ಸುಮಾರು ನೂರೈವತ್ತು ವರ್ಷಗಳ ಹಿಂದಿನವರೆಗೂ ಆಕಳ ಹಾಲನ್ನು ನೇರವಾಗಿ ಕುಡಿಯುತ್ತಿದ್ದುದು ಕಡಿಮೆಯೇ, ಅದನ್ನು ಹೆಚ್ಚಾಗಿ ಬೆಣ್ಣೆ ಮತ್ತು ಗಿಣ್ಣುಗಳನ್ನು ತಯಾರಿಸಲಿಕ್ಕೆಂದು ಬಳಸಲಾಗುತ್ತಿತ್ತಷ್ಟೇ.[Rollinger M] ಹಾಲು ನಮ್ಮ ಆಹಾರದ ಅವಿಭಾಜ್ಯ ಅಂಗವಾಗಿ ಬಿಟ್ಟದ್ದು ತೀರಾ ಇತ್ತೀಚೆಗಷ್ಟೇ. ಪ್ಯಾಶ್ಚೀಕರಣ, ಮೇದಸ್ಸಿನ ಪ್ರತ್ಯೇಕಿಸುವಿಕೆ, ಅದಾಗಿ ಉಳಿದ ದ್ರಾವಣವನ್ನು ಬಲವಂತದಿಂದ ಮಿಶ್ರಣ ಮಾಡುವುದು (homogenization) ಇವೇ ಮುಂತಾದ ತಂತ್ರಜ್ಞಾನಗಳನ್ನು ಕಳೆದ ನೂರು ವರ್ಷಗಳಲ್ಲಿ ಅಭಿವೃದ್ಧಿ ಪಡಿಸಲಾಗಿದೆ.[Brief History] ಇಂದು 'ಹಾಲು' ಎಂದು ಮಾರಲ್ಪಡುತ್ತಿರುವ ದ್ರಾವಣಕ್ಕೂ, ಎಂಭತ್ತರಿಂದ ನೂರು ವರ್ಷಗಳ ಹಿಂದೆ ಮನುಷ್ಯರು ಬಳಸುತ್ತಿದ್ದ ಆಕಳ ಹಾಲಿಗೂ ಬಹಳಷ್ಟು ವ್ಯತ್ಯಾಸಗಳಿವೆ. ಆದರೇನು?  ಈಗ ಹಾಲಿನ ಬಳಕೆಯು ಒಂದು ಅತಿ ದೊಡ್ಡ ಉದ್ಯಮವಾಗಿ ಬೆಳೆದಿದೆ, ಸಂಸ್ಕರಿತಗೊಂಡು ತನ್ನ ನಿಸರ್ಗ ಸಹಜತೆಯನ್ನು ಕಳೆದುಕೊಂಡಿರುವ 'ಹಾಲು' ಮತ್ತದರ ಉತ್ಪನ್ನಗಳು ಮನುಷ್ಯನಿಗೆ ಅತ್ಯಗತ್ಯವೆಂದೂ, ಅವು ತಾಯಿಯ ಹಾಲಿನಷ್ಟೇ ಅಥವಾ ಅದಕ್ಕಿಂತಲೂ ಉತ್ತಮವೆಂದೂ ಬಿಂಬಿಸಲಾಗುತ್ತಿದೆ!

ಹಾಲಿನಲ್ಲಿ ಲ್ಯಾಕ್ಟೋಸ್ ಎಂಬ ಸಕ್ಕರೆ, ಹಲವು ತರಹದ ಮೇದಸ್ಸುಗಳು, ಪ್ರೊಟೀನುಗಳು, ಖನಿಜಗಳು ಇವೇ ಮುಂತಾದ ಪೌಷ್ಟಿಕಾಂಶಗಳು ನಿರ್ದಿಷ್ಟವಾದ ಅನುಪಾತದಲ್ಲಿ ಸಮ್ಮಿಶ್ರಣಗೊಂಡಿರುತ್ತವೆ ಮತ್ತು ಇವುಗಳ ಪ್ರಮಾಣವು ಶಿಶುವಿನ ಅಗತ್ಯಗಳಿಗನುಗುಣವಾಗಿ ಪ್ರತಿಯೊಂದು ಸಸ್ತನಿಯಲ್ಲಿಯೂ ಭಿನ್ನವಾಗಿರುತ್ತವೆ. ಅಂತಹಾ ಹಾಲಿನಿಂದ ಕೆನೆಯನ್ನು ಪ್ರತ್ಯೇಕಿಸಿ ತೆಗೆದಾಗ ಈ ಆಹಾರಾಂಶಗಳ ನಿಸರ್ಗಸಹಜವಾದ ಅನುಪಾತವು ಬದಲಾಗಿ, ಅದು ಕೇವಲ ಪ್ರೊಟೀನುಗಳು  ಮತ್ತು ಕ್ಯಾಲ್ಸಿಯಂ ಪ್ರಮಾಣವೇ ಹೆಚ್ಚಾಗಿರುವ ಬೆಳ್ಳಗಿನ ಪ್ರಾಣಿಜನ್ಯ ದ್ರಾವಣವಾಗಿ ಬಿಡುತ್ತದೆ, ಅಷ್ಟೆ! ಪಶುಗಳ ಹಾಲಿನಲ್ಲಿರುವ ಇವೇ ಪ್ರೊಟೀನುಗಳು ಮನುಷ್ಯನ ಶರೀರಕ್ಕೆ ಒಗ್ಗದೆ ಹಲವು ತರಹದ ತೊಂದರೆಗಳನ್ನುಂಟುಮಾಡಬಹುದೆಂದು ಅಧ್ಯಯನಗಳು ತೋರಿಸಿವೆ. [Almås H; Kitazawa H, 2007; Rytkönen J, 2006; Stengler M; Tailford KA, 2003] ಇನ್ನೊಂದೆಡೆ, ಪ್ಯಾಶ್ಚೀಕರಣದ ತಾಪದಿಂದ ಹಾಲಿನ ಪ್ರೊಟೀನುಗಳಲ್ಲಿ ಉಂಟಾಗುವ ಬದಲಾವಣೆಗಳು ಮತ್ತು ಅಂತಹಾ ಪ್ರೊಟೀನುಗಳಿಂದ ಮನುಷ್ಯರ ಮೇಲಾಗುವ ಪರಿಣಾಮಗಳ ಬಗ್ಗೆ ಆಳವಾದ ಅಧ್ಯಯನಗಳು ಇದುವರೆಗೂ ನಡೆದಂತಿಲ್ಲ. [Alvarez; Real Milk; Rytkönen J, 2006]

ಹಾಲಿನಲ್ಲಿ ಏನೇನಿದೆ ಎಂಬ ಬಗ್ಗೆ ನಮಗಿನ್ನೂ ಸಂಪೂರ್ಣವಾದ ಅರಿವಿಲ್ಲವೆಂದೇ ಹೇಳಬೇಕು. ರಕ್ತನಾಳಗಳ ಬೆಳೆತವನ್ನು ಪ್ರಚೋದಿಸುವ ಅಂಶವೊಂದು ತಾಯಿಯ ಹಾಲಲ್ಲಿರುವುದನ್ನು ತೀರಾ ಇತ್ತೀಚೆಗೆ ಪತ್ತೆ ಮಾಡಲಾಗಿದೆ.[Hoshimoto, 2000]. ಇಂತಹಾ ಹಲವು ಬೆಳೆತ ಪ್ರಚೋದಕಗಳು ಹಾಲಲ್ಲಿದ್ದು ನವಜಾತ ಶಿಶುವಿನ ಕರುಳು, ರೋಧವ್ಯವಸ್ಥೆ, ನರಮಂಡಲ, ಎಲುಬುಗಳು ಇವೇ ಮತ್ತಿತರ ಅಂಗಾಂಗಗಳ ತ್ವರಿತವಾದ ಬೆಳವಣಿಗೆಗೆ ಪುಷ್ಟಿಯನ್ನು ನೀಡುತ್ತವೆ.[Grosvenor CE, 1993]. ಆದರೆ ಶೈಶವಾವಸ್ಥೆಯ ಬಳಿಕವೂ ಹಾಲನ್ನು ಕುಡಿಯುವುದರಿಂದ ಇವೇ ಬೆಳೆತ ಪ್ರಚೋದಕಗಳು ಅಸಾಮಾನ್ಯವಾದ, ಅಸಹಜವಾದ ಬೆಳೆತಕ್ಕೆ ಕಾರಣವಾಗಬಲ್ಲವು. ಅಧಿಕ ಪ್ರಮಾಣದಲ್ಲಿ ಪಶುಗಳ ಹಾಲನ್ನು ಕುಡಿಯುವ ಮಕ್ಕಳು ಹೆಚ್ಚು ಎತ್ತರಕ್ಕೆ ಬೆಳೆಯುತ್ತಾರೆನ್ನುವುದನ್ನು ಹಲವಾರು ಅಧ್ಯಯನಗಳು ತೋರಿಸಿವೆ. [Hoppe C, 2006; Okada T, 2004; Rich-Edwards JW, 2007; Wiley AS, 2005]

ಹಾಲಿನಲ್ಲಿರುವ IGF-1 ನಂತಹ ಬೆಳೆತ ಪ್ರಚೋದಕಗಳು ಗಂತಿಗಳ ಬೆಳವಣಿಗೆಯನ್ನು ಪ್ರಚೋದಿಸುತ್ತವೆ ಹಾಗೂ  ಹಾಲನ್ನು ಅಧಿಕ ಪ್ರಮಾಣದಲ್ಲಿ ಸೇವಿಸುವವರಲ್ಲಿ ಹಲವು ತರಹದ ಅರ್ಬುದ ಗಂತಿಗಳು ಹೆಚ್ಚು ಸಾಮಾನ್ಯವೆನ್ನುವುದೀಗ ಸಂಶಯಾತೀತವಾಗಿ ಗುರುತಿಸಲ್ಪಟ್ಟಿದೆ.[Epstein SS, 1996; Larsen HR; Oransky I; PCRM; Stewart A, 2004] ಅದೇ ರೀತಿ ಪಶುಗಳ ಹಾಲಿನಲ್ಲಿ ಸ್ರವಿಸಲ್ಪಡುವ ಹಲವು ತರಹದ ಹಾರ್ಮೋನುಗಳು ಮನುಷ್ಯರ ಪ್ರಜನನಾಂಗಗಳ ಮೇಲೆ ವರ್ತಿಸುವುದರಿಂದ ಸಂತಾನಶಕ್ತಿಯ ಮೇಲೆ ಪರಿಣಾಮಗಳುಂಟಾಗಬಹುದು ಮಾತ್ರವಲ್ಲ, ಈ ಅಂಗಗಳಲ್ಲಿ ಕ್ಯಾನ್ಸರ್ ಬೆಳೆಯುವುದಕ್ಕೂ ಕಾರಣವಾಗಬಹುದು.[Ganmaa D, 2001; Ganmaa D, 2002; Ganmaa D, 2003; Ganmaa D, 2005; Health Effects; Li D, 2003; Sato A]

ಪಶುಗಳು ಸೇವಿಸುವ ಆಹಾರ ಮತ್ತು ಅದರ ಮೂಲಕ ಅವುಗಳ ದೇಹವನ್ನು ಸೇರುವ ಕೀಟನಾಶಕಗಳು, ಪಶುಗಳಿಗೆ ನೀಡುವ ಹಲವು ತರಹದ ಔಷಧಗಳು ಹಾಗೂ ಬೆಳೆತ ಪ್ರಚೋದಕಗಳು - ಇವೆಲ್ಲವೂ ಹಾಲಿನಲ್ಲಿ ಸ್ರವಿಸಲ್ಪಟ್ಟು ಅದನ್ನು ಕುಡಿದವರಿಗೆ ತೊಂದರೆಯನ್ನುಂಟುಮಾಡಬಹುದು.[Epstein SS, 1996; Palmer LF]

ಹಾಗಾದರೆ ಹಾಲನ್ನು ಕುಡಿಯಬಾರದೇ? ಬೇಕೇ ಬೇಕು ಮತ್ತು ಖಂಡಿತಾ ಕೂಡದು. ತಾಯಿಯ ಹಾಲನ್ನು ಮಗುವಿಗೆ ಕುಡಿಸಲೇ ಬೇಕು. ಪಶುವಿನ ಹಾಲನ್ನು ಕುಡಿಯಲೇ ಬಾರದು. ಮೊದಲನೆಯದು ನಿಸರ್ಗಸಹಜ ಸತ್ಯ, ಎರಡನೆಯದು ಕೋಟಿ ಕೋಟಿಗಟ್ಟಲೆಯ ವ್ಯವಹಾರ.

• ತಾಯಿಯ ಹಾಲು ಆಕೆಯ ಮಗುವಿನ ಪಾಲಿಗೆ ಅತ್ಯುತ್ಕೃಷ್ಟವಾದ, ಸಂಪೂರ್ಣವಾದ ಆಹಾರ. ನವಜಾತ ಶಿಶುವಿಗೆ ತಾಯಿಯ ಹಾಲು ಬೇಕೇ ಬೇಕು, ಮಾತ್ರವಲ್ಲ, ಮೊದಲ ಆರು ತಿಂಗಳುಗಳ ಕಾಲ ಬೇರೇನನ್ನೂ ಮಗುವಿಗೆ ಉಣಿಸಬಾರದು.

• ತಾಯಿಯ ಹಾಲಷ್ಟೇ ಆಕೆಯ ಮಗುವಿಗೆ ಆಹಾರ; ಒಂದು ಪ್ರಾಣಿಯ ಹಾಲು ಇನ್ನೊಂದು ಪ್ರಾಣಿಗೆ ಆಹಾರವಾಗಲಾರದು, ಇನ್ನೊಂದು ಶರೀರಕ್ಕೆ ಒಗ್ಗದು.

• ಅನ್ಯ ಪ್ರಾಣಿಗಳ ಹಾಲು ಶಿಶುವಿನ ಕರುಳಲ್ಲಿ ಸರಿಯಾಗಿ ಜೀರ್ಣವಾಗುವುದಿಲ್ಲ [Rees L] ಮಾತ್ರವೇ ಅಲ್ಲ, ಅದರಲ್ಲಿರುವ ಮೇದಸ್ಸು, ಪ್ರೊಟೀನು ಹಾಗೂ ಸಕ್ಕರೆಗಳ ಅನುಪಾತವು ತಾಯಿಯ ಹಾಲಿಗಿಂತ ತೀರಾ ಭಿನ್ನವಾಗಿರುವುದರಿಂದ ಶಿಶುವಿನ ಬೆಳವಣಿಗೆಗೆ ತೊಂದರೆಯಾಗಬಹುದು, ನಂತರವೂ ಹಲವು ತರದ ಕಾಹಿಲೆಗಳಿಗೆ ಹೇತುವಾಗಬಹುದು.[Oski FA, 1985]

• ಬೆಳ್ಳಗಿರುವುದೆಲ್ಲಾ ಹಾಲಲ್ಲ. ಪಶುಗಳ ಹಾಲನ್ನು ಶೇಖರಿಸಿ ಮಾರಾಟ ಮಾಡುವ ಪ್ರಕ್ರಿಯೆಯಲ್ಲಿ ಹಾಲಾಗಿದ್ದದ್ದು ಹಲವು ಬದಲಾವಣೆಗಳಿಗೆ ಒಳಗಾಗಿ ಗ್ರಾಹಕನ ಕೈಗೆ ತಲುಪುವಾಗ ನೈಸರ್ಗಿಕವಾದ ಹಾಲಾಗಿರದೇ ತಾಪಕ್ಕೆ ಸಿಕ್ಕು ಬದಲಾದ ಪ್ರೊಟೀನುಗಳು, ಸಕ್ಕರೆ ಮತ್ತು ಕ್ಯಾಲ್ಸಿಯಂ ತುಂಬಿರುವ ಬಿಳಿ ದ್ರಾವಣವಾಗಿರುತ್ತದೆ. ಇದರಿಂದ ಮಾನವನ ದೇಹಕ್ಕೆ ಪ್ರಯೋಜನಗಳಿಗಿಂತ ತೊಂದರೆಗಳೇ ಜಾಸ್ತಿ.[Real Milk]

• ಪಶುಗಳ ಹಾಲಿನ ಸೇವನೆಯಿಂದ ಬೊಜ್ಜು, ರಕ್ತನಾಳಗಳ ಒಳಭಿತ್ತಿಯ ಪೆಡಸಾಗುವಿಕೆ, ಮಧುಮೇಹ, ಪಚನಾಂಗದ ಹಲವು ಕಾಹಿಲೆಗಳು, ಶ್ವಾಸಾಂಗದ ತೊಂದರೆಗಳು, ಹಲವು ತರಹದ ಕ್ಯಾನರ್ ಗಳು, ಮೂಳೆಸವೆತ ಮತ್ತು ಮೂಳೆಮುರಿತ, ಹಲವು ಸೋಂಕುರೋಗಗಳು, ಮೊಡವೆಗಳು, ಮೂತ್ರಪಿಂಡದ ಹರಳುಗಳು ಇವೇ ಮುಂತಾದ ಹಲವಾರು ಸಮಸ್ಯೆಗಳಿಗೆ ಕಾರಣವಾಗುತ್ತದೆ.

ನವಜಾತ ಶಿಶುವಿಗೆ ತಾಯಿಯ ಹಾಲೇಕೆ ಬೇಕು?

ತನ್ನ ಮಗುವಿಗಾಗಿ ತಾಯಿಯು ಸ್ರವಿಸುವ ವಿಶಿಷ್ಟವಾದ ಆಹಾರವೇ ಹಾಲು. ಅದೊಂದು 'ಜೀವಂತವಾಗಿರುವ' ದ್ರಾವಣ. ಮಗುವಿಗೆ ಶಕ್ತಿಯನ್ನು ಒದಗಿಸುವ ಲ್ಯಾಕ್ಟೋಸ್ ಎಂಬ ಸಕ್ಕರೆ, ಮಗುವಿನ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಿ ನವಜಾತ ಶಿಶುವನ್ನು ವಿವಿಧ ಸೋಂಕುಗಳಿಂದ ರಕ್ಷಿಸುವ ಪ್ರೋಟೀನುಗಳು ಮತ್ತು ನವಜಾತ ಶಿಶುವಿನ ಮಿದುಳಿನ ಬೆಳವಣಿಗೆಗೆ ಅತ್ಯಗತ್ಯವಾದ ಹಲವು ಬಗೆಯ ವಿಶಿಷ್ಟವಾದ ಮೇದಸ್ಸುಗಳು ಹಾಲಿನಲ್ಲಿರುತ್ತವೆ. ಈ ಹಾಲಿನ ಮೂಲಕ ತಾಯಿ ಮತ್ತು ಮಗುವಿನ ಬೆಸುಗೆಯು ಮಗುವಿನ ಜನನಾನಂತರವೂ ಮುಂದುವರಿಯುತ್ತದೆ, ಮಗುವಿನ ದೈಹಿಕ, ಬೌದ್ಧಿಕ ಹಾಗೂ ಮಾನಸಿಕ ಬೆಳವಣಿಗೆಗೆ ಕಾರಣವಾಗುತ್ತದೆ. ಆದ್ದರಿಂದಲೇ ಹಾಲು ಆಯಾ ಶಿಶುವಿಗೆ ತನ್ನ ತಾಯಿಯಿಂದ ಲಭಿಸುವ ವಿಶಿಷ್ಟವಾದ ಪೋಷಣೆಯಾಗಿದ್ದು, ಬೇರೊಂದು ಹಾಲಿನಲ್ಲಿರುವ ಇವೇ ಅಂಶಗಳು ಮಗುವಿನ ದೇಹಕ್ಕೆ ಒಗ್ಗಲಾರವು.

ಮಗುವು ಜನಿಸಿದ ಅರ್ಧ ಗಂಟೆಯೊಳಗೆ ತಾಯಿಯು ಹಾಲೂಡಿಸುವುದರಿಂದ ಮಗುವಿನ ಮಿದುಳಿನಲ್ಲಿ ಆಹಾರ ಸೇವನೆಯನ್ನು ನಿಯಂತ್ರಿಸುವ ವ್ಯವಸ್ಥೆಯು ಸರಿಯಾಗಿ ರೂಪುಗೊಂಡು ಬಲಗೊಳ್ಳುತ್ತದೆ, ಜೀವನಪರ್ಯಂತ ಹಸಿವು, ಆಹಾರ ಸೇವನೆ ಮತ್ತು ಅದರಿಂದ ಸಂತೃಪ್ತಿಯನ್ನು ಸರಿಯಾಗಿ ನಿಭಾಯಿಸಲು ಸಾಧ್ಯವಾಗುತ್ತದೆ. [Alexe D, 2006; Bonnet M, 2002; Bouret SG, 2004; Bouret SG, 2004b; Bouret SG, 2004c; Casabiell X, 1997; El-Haddad MA, 2004; Gluckman PD, 2006; Gunderson EP, 2007; Gupta A; Mantzoros CS; Miralles O, 2006; Pico´ C, 2007; Salimei E, 2002; Steppan CM, 1999] ಹುಟ್ಟಿದ ಮಗುವಿಗೆ ಜನನದ ಅರ್ಧ ತಾಸಿನೊಳಗೆ ತಾಯಿಯ ಹಾಲನ್ನೂಡಿಸುವುದರಿಂದ ಬೊಜ್ಜು, ಮಧುಮೇಹ ಇವೇ ಮುಂತಾದ ಉಪಾಪಚಯ ಸಂಬಂಧಿ ರೋಗಗಳನ್ನು ತಡೆಯಲು ಸಾಧ್ಯವಾಗಬಹುದು.[ಮುಂದೆ ನೋಡಿ]

ತಾಯಿಯ ಗರ್ಭದಿಂದ ಹೊರಬಂದ ಬಳಿಕ ಸ್ತನಪಾನವನ್ನು ಮಾಡುವ ಮೊದಲ ವರ್ಷದಲ್ಲಿ ಶಿಶುವಿನ ದೇಹದಲ್ಲಿ ಅದಕ್ಕೆ ಪೂರಕವಾದ ಬದಲಾವಣೆಗಳು ಉಂಟಾಗುತ್ತವೆ,[Summary, 1985] ಮಗುವಿನ ರೋಧವ್ಯವಸ್ಥೆಯಲ್ಲಿಯೂ ಸೂಕ್ತವಾದ ಬದಲಾವಣೆಗಳಾಗುತ್ತವೆ. ಮೊದಲ ಆರು ತಿಂಗಳುಗಳಲ್ಲಿ ಮಗುವಿನ ಕರುಳು ಯಾವುದೇ ಅಡ್ಡಿಗಳನ್ನೊಡ್ಡದೆ ಒಳಬಂದದ್ದೆಲ್ಲವನ್ನೂ ಹೀರಿಕೊಳ್ಳುತ್ತದೆ.  ಈ ಕಾರಣಗಳಿಂದಾಗಿಯೇ, ನವಜಾತ ಶಿಶುವಿಗೆ ಮೊದಲ ಆರು ತಿಂಗಳುಗಳ ಕಾಲ ತಾಯಿಯ ಹಾಲನ್ನು ಮಾತ್ರವೇ ಉಣಿಸಬೇಕೆಂದೂ, ಬೇರೆ ಏನನ್ನೂ (ನೀರನ್ನೂ ಸಹ) ಉಣಿಸಬಾರದೆಂದೂ ಈಗ ಒತ್ತಿ ಹೇಳಲಾಗುತ್ತಿದೆ. [CDC; WHO]

ತಾಯಿಯ ಹಾಲಿನ ಪೋಷಣೆಯಿಂದ ಮಗುವಿಗೆ ಹಲವಾರು ಲಾಭಗಳಿವೆ. ತಾಯಿಯ ಹಾಲನ್ನು ಕುಡಿದ ಮಕ್ಕಳು ಕೃತಕ ಆಹಾರವನ್ನು ಪಡೆದ ಮಕ್ಕಳಿಗಿಂತ ಚೆನ್ನಾಗಿ ಬೆಳೆಯುತ್ತಾರೆ ಹಾಗೂ ರೋಧಶಕ್ತಿಯನ್ನು ಪಡೆದಿರುತ್ತಾರೆ. ಕೃತಕ ಆಹಾರವನ್ನು ಸೇವಿಸಿದ ಮಕ್ಕಳಿಗೆ ಹೋಲಿಸಿದರೆ, ಸ್ತನಪಾನವನ್ನು ಮಾಡಿದ ಮಕ್ಕಳ ಬೌಧ್ಧಿಕ ಬೆಳವಣಿಗೆಯು ಉತ್ತಮವಾಗಿದ್ದು, ಅವರು ರೋಗಗ್ರಸ್ತರಾಗುವ ಸಂಭವವು ಕಡಿಮೆಯಾಗಿರುತ್ತದೆ ಎನ್ನುವುದನ್ನು ಅಧ್ಯಯನಗಳು ತೋರಿಸಿವೆ.[Breastfeeding, 2005; Dewey KG, 1998] ತಾಯಿಯ ಹಾಲಿನ ಪೋಷಣೆಯಿಂದ ಹಲವು ತರದ ಸೋಂಕು ರೋಗಗಳನ್ನು ತಡೆಯಲು ಅಥವಾ ಅವುಗಳ ತೀವ್ರತೆಯನ್ನು ಸಾಕಷ್ಟು ಕಡಿಮೆ ಮಾಡಲು ಸಾಧ್ಯವಿದೆ. ಕೆಲವು ಮಕ್ಕಳು ತಮ್ಮ ಮೊದಲ ವರ್ಷದಲ್ಲಿ ಯಾವುದೇ ನಿರ್ದಿಷ್ಟ ಕಾರಣಗಳಿಲ್ಲದೇ ಹಠಾತ್ತನೇ ಸಾಯುವುದಿದ್ದು, ತಾಯಿಯ ಹಾಲುಂಡ ಮಕ್ಕಳಲ್ಲಿ ಇಂತಹಾ ಪ್ರಕರಣಗಳು ವಿರಳವಾಗಿರುತ್ತವೆ. ಮಕ್ಕಳಲ್ಲಿ ಹಾಗೂ ವಯಸ್ಕರಲ್ಲಿ ಕಂಡುಬರುವ ಮೊದಲನೇ ಮತ್ತು ಎರಡನೇ ವಿಧದ ಮಧುಮೇಹ, ದುಗ್ಧರಸ ಗ್ರಂಥಿಗಳ ಕ್ಯಾನ್ಸರ್ (ಲಿಂಫೋಮಾ), ರಕ್ತದ ಕ್ಯಾನ್ಸರ್ (ಲ್ಯುಕೀಮಿಯಾ), ಬೊಜ್ಜು, ಕೊಲೆಸ್ಟೆರಾಲ್ ಹೆಚ್ಚಳ, ಅಸ್ತಮಾ ಮುಂತಾದ ಕಾಹಿಲೆಗಳು ಕೂಡಾ ಸ್ತನಪಾನ ಮಾಡಿದವರಲ್ಲಿ ಕಡಿಮೆಯಾಗಿರುತ್ತವೆ.

ಹುಟ್ಟಿದ ಅರ್ಧ ತಾಸಿನೊಳಗೆ ಶಿಶುವಿಗೆ ಸ್ತನಪಾನವನ್ನು ನೀಡುವುದು ಅತ್ಯಗತ್ಯ, ಹೀಗೆ ಮಾಡುವುದರಿಂದ ಮಗುವಿನ ಮೆದುಳಲ್ಲಿ ಆಹಾರ ಸೇವನೆಯನ್ನು ನಿಯಂತ್ರಿಸುವ ವ್ಯವಸ್ಥೆಯು ದೃಢಗೊಳ್ಳುತ್ತದೆ. ಸ್ತನಪಾನ ಮಾಡಿದ ಮಕ್ಕಳಲ್ಲಿ ಉಪಾಪಚಯದ ಗತಿಯು ಕಡಿಮೆಯಿದ್ದು, ಅವರು ತಮ್ಮ ಆಹಾರ ಸೇವನೆಯ ಪ್ರಮಾಣವನ್ನು ಕೆಳಮಟ್ಟದಲ್ಲೇ ನಿಯಂತ್ರಿಸಬಲ್ಲವರಾಗಿರುತ್ತಾರೆ. ಕಡಿಮೆ ಆಹಾರ ಸೇವನೆಯಿಂದಲಾಗಲೀ, ನಿಧಾನಗತಿಯಲ್ಲಿ ತೂಕವನ್ನು ಹೆಚ್ಚಿಸಿಕೊಳ್ಳುವುದರಿಂದಾಗಲೀ ಸ್ತನಪಾನ ಮಾಡಿದ ಮಕ್ಕಳಲ್ಲಿ ಯಾವುದೇ ದುಷ್ಪರಿಣಾಮಗಳು ಕಂಡುಬರುವುದಿಲ್ಲ.  ಸ್ತನಪಾನ ಮಾಡಿದ ಮಕ್ಕಳು ನೀಳಕಾಯರಾಗಿರುವುದು ಮಾತ್ರವೇ ಅಲ್ಲ, ಇತರ ಆಹಾರಗಳ ಸೇವನೆಯನ್ನು ತೊಡಗಿದ ಬಳಿಕವೂ ಅವರ ತೂಕವು ಬೇಗನೇ ಹೆಚ್ಚುವುದಿಲ್ಲ. ಅಂದರೆ, ಸ್ತನಪಾನ ಮಾಡಿದ ಮಕ್ಕಳು ಬೊಜ್ಜಿನಿಂದ ಸುರಕ್ಷಿತರಾಗಿರುತ್ತಾರೆ ಎಂದಾಯಿತು. ಇನ್ನೊಂದೆಡೆ, ನವಜಾತ ಶಿಶುಗಳಿಗೆ ಕೃತಕವಾಗಿ ತಯಾರಿಸಿದ ಶಿಶು ಆಹಾರವನ್ನು ಕೊಡುವುದರಿಂದ, ಎಳವೆಯಿಂದಲೇ ಅವರ ದೇಹದಲ್ಲಿ ಬೊಜ್ಜು ಬೆಳೆಯಲು ಕಾರಣವಾಗುತ್ತದೆ. ವಿಶ್ವ ಆರೋಗ್ಯ ಸಂಸ್ಥೆಯು 1997 ರಿಂದ 2003ರವರೆಗೆ ಬ್ರೆಜಿಲ್, ಘಾನಾ, ಭಾರತ, ನಾರ್ವೇ, ಒಮನ್ ಮತ್ತು ಅಮೆರಿಕಾ ದೇಶಗಳಲ್ಲಿ ನವಜಾತ ಶಿಶುಗಳಲ್ಲಿ ನಡೆಸಿದ ಅಧ್ಯಯನದಲ್ಲಿ ಒಂದು ಆಶ್ಚರ್ಯಕರವಾದ  ವಿಷಯವು ಹೊರಹೊಮ್ಮಿತು [Baby growth; Bonyata K; WHO revises]: ಮೊದಲ ಆರು ತಿಂಗಳಲ್ಲಿ ಕೇವಲ ಸ್ತನಪಾನವನ್ನು ಮಾತ್ರವೇ ಮಾಡಿದ ಮಕ್ಕಳ ದೇಹತೂಕವು, ಮಕ್ಕಳ ಬೆಳವಣಿಗೆಯ ಪಟಕ್ಕೆ [Hawkes N] ಹೋಲಿಸಿದಾಗ ಕಡಿಮೆಯಿರುವುದು ಕಂಡುಬಂದಿತು. ಕಳೆದ ಸುಮಾರು ಮೂವತ್ತು ವರ್ಷಗಳಿಂದ ಬಳಕೆಯಲ್ಲಿದ್ದ ಆ ಪಟವನ್ನು ಇಂಗ್ಲೆಂಡಿನಲ್ಲಿ ನಡೆಸಿದ್ದ ಅಧ್ಯಯನಗಳ ಅಧಾರದಲ್ಲಿ  ತಯಾರಿಸಲಾಗಿತ್ತು ಮತ್ತು ಕೃತಕ ಆಹಾರವನ್ನು ಸೇವಿಸಿದ್ದ ಮಕ್ಕಳ ತೂಕವನ್ನೂ ಅದರಲ್ಲಿ ಪರಿಗಣಿಸಲಾಗಿತ್ತು. ಅಂದರೆ, ಕೃತಕ ಆಹಾರವನ್ನು ಸೇವಿಸುವ ಮಕ್ಕಳ ತೂಕವು ತೀರಾ ಎಳವೆಯಿಂದಲೇ ಅಧಿಕವಾಗಿರುತ್ತದೆ ಎನ್ನುವ ಸತ್ಯದ ಅರಿವಾಗಲು ಇಷ್ಟು ವರ್ಷ ಬೇಕಾಯಿತು! ಶಿಶುಗಳಿಗೆ ಕೃತಕ ಆಹಾರವನ್ನು ನೀಡುವುದರಿಂದ ಅತಿ ಸಣ್ಣ ವಯಸ್ಸಿನಿಂದಲೇ ಅವರಲ್ಲಿ ಬೊಜ್ಜು ಬೆಳೆಯುತ್ತದೆ ಎನ್ನುವುದೀಗ ತಡವಾಗಿಯಾದರೂ ಅರ್ಥವಾಗಿದೆ! ಇದೀಗ ಕಳೆದ ಒಂದು ವರ್ಷದಿಂದ ಈ ಹೊಸ ಬಹುದೇಶೀಯ ಅಧ್ಯಯನದ ಅಧಾರದಲ್ಲಿ, ಮಕ್ಕಳ ತೂಕವನ್ನು ಕಡಿಮೆಯಾಗಿ ಸೂಚಿಸುವ ಹೊಸ ಪಟವನ್ನು ವಿಶ್ವಸಂಸ್ಥೆಯು ಬಳಕೆಗೆ ತಂದಿದೆ. ಸ್ತನಪಾನವೇ ಮಗುವಿನ ನಿಸರ್ಗಸಹಜವಾದ ಆಹಾರವೆಂದೂ, ಸ್ತನಪಾನ ಮಾಡಿದ ಮಕ್ಕಳಲ್ಲಿ ಕಂಡುಬರುವ ಬೆಳವಣಿಗೆಯೇ ಸಹಜವಾದ ಬೆಳವಣಿಗೆಯೆಂದೂ ಈಗಲಾದರೂ ನಾವು ಒಪ್ಪಿಕೊಳ್ಳುವಂತಾಯಿತಲ್ಲ! [Onis MD, 2006] ಮನುಕುಲವು ಬಾಹ್ಯಾಕಾಶಕ್ಕೊಂದು ಕೃತಕ ಉಪಗ್ರಹವನ್ನು ಉಡಾಯಿಸಿ ಐವತ್ತು ವರ್ಷಗಳೇ ಕಳೆದರೂ, ತಾಯಿಯ ಹಾಲೇ ಮಗುವಿನ ಪಾಲಿಗೆ ಸರ್ವಶ್ರೇಷ್ಠವಾದ (ಮತ್ತು ಏಕೈಕ) ಆಹಾರವೆಂದು ಒಪ್ಪಿಕೊಳ್ಳುವುದಕ್ಕೆ ಕ್ರಿ.ಶ. 2006ನೇ ವರ್ಷದವರೆಗೆ ಮನುಕುಲವು ಕಾಯಬೇಕಾಯಿತು!

ಮಗುವಿನ ಪಾಲಿಗೆ ತಾಯಿಯ ಹಾಲೇ ಅಮೃತ. ಬೇರಾವ ಆಹಾರವೂ ಅದಕ್ಕೆ ಎಳ್ಳಷ್ಟೂ ಹೋಲಿಕೆಯಲ್ಲ. ಪಶುವಿನ ಹಾಲು ಯಾ ಕೃತಕವಾಗಿ ತಯಾರಿಸಿದ 'ಶಿಶು ಆಹಾರ' ಗಳನ್ನು ತಾಯಿಯ ಹಾಲಿನಷ್ಟೇ ಅಥವಾ ಅದಕ್ಕಿಂತಲೂ ಶ್ರೇಷ್ಠವೆಂದು ಮುಂದೊಡ್ಡುವುದು ತಾಯ್ತನಕ್ಕೊಂದು ಅಪಮಾನ ಮಾತ್ರವೇ ಅಲ್ಲ, ತಾಯಿ ಮತ್ತು ಮಗುವಿನ ನಡುವಿನ ಅತಿ ವಿಶಿಷ್ಟವಾದ ಬೆಸುಗೆಯನ್ನು ಮುರಿಯುವ ಕುಟಿಲ ಪ್ರಯತ್ನವೂ ಹೌದು.

ಎಲ್ಲಾ ಸಸ್ತನಿಗಳ ಹಾಲು ಒಂದೇ ರೀತಿಯದ್ದಾಗಿರುವುದಿಲ್ಲ. ಈ ಕೆಳಗಿನ ಹೋಲಿಕೆಯನ್ನು ಗಮನಿಸಿ:[Cip; Dairyforall a,b,c; Foodsci; Saanendoah]

ಮಾನವ ಹಾಲಿನಲ್ಲಿ ಸಕ್ಕರೆ ಹಾಗೂ ಮೇದಸ್ಸುಗಳ ಪ್ರಮಾಣವು ಅಧಿಕವಿದ್ದು, ಪ್ರೊಟೀನುಗಳ ಪ್ರಮಾಣವು ಕಡಿಮೆಯಿರುತ್ತದೆ, ಆದರೆ ಪಶುಗಳ ಹಾಲಿನಲ್ಲಿ ಪ್ರೋಟೀನುಗಳ ಪ್ರಮಾಣವು ಹೆಚ್ಚಿರುತ್ತದೆ. ಮಾನವ ಹಾಲಿನಲ್ಲಿ ಕ್ಯಾಲ್ಸಿಯಂ ಪ್ರಮಾಣವು ಪಶುಗಳ ಹಾಲಿನ ನಾಲ್ಕನೇ ಒಂದರಷ್ಟಿದ್ದರೆ, ಫಾಸ್ಫರಸ್ ನ ಪ್ರಮಾಣವು ಅದರ ಎಂಟನೇ ಒಂದರಷ್ಟಿದೆ. ಇದಕ್ಕೆ ಕಾರಣವೂ ಅತಿ ಸರಳ: ಪಶುಗಳ ಮರಿಗಳಿಗೆ ಹೋಲಿಸಿದರೆ, ಮಾನವ ಶಿಶುವಿನ ಬೆಳವಣಿಗೆಗೆ ಸಾಕಷ್ಟು ಕಡಿಮೆ ಪ್ರಮಾಣದ ಪ್ರೊಟೀನು, ಕ್ಯಾಲ್ಸಿಯಂ ಮತ್ತು ಫಾಸ್ಫರಸ್ ಅಗತ್ಯವಿರುತ್ತದೆ. ಆದ್ದರಿಂದ, ಪಶುಗಳ ಹಾಲಿನ ಈ ಆಹಾರಾಂಶಗಳನ್ನು ಇಷ್ಟೊಂದು ಅಧಿಕ ಪ್ರಮಾಣದಲ್ಲಿ ಸೇವಿಸುವುದರಿಂದ ನಮ್ಮ ದೇಹಕ್ಕೆ ಪ್ರಯೋಜನಕ್ಕಿಂತ ಹೆಚ್ಚು ಹಾನಿಯನ್ನೇ ಉಂಟುಮಾಡಬಹುದು.

ಜನನಾನಂತರ ಮಗುವಿನ ಮಿದುಳಿನ ಬೆಳವಣಿಗೆಯ ವಿಶೇಷವಾದ ಅಗತ್ಯಗಳನ್ನು ಹಾಲಿನಲ್ಲಿರುವ ಮೇದಸ್ಸು ಪೂರೈಸುತ್ತದೆ. ಹಾಲಿನಲ್ಲಿರುವ ದೀರ್ಘ ಸರಣಿಯ ಅಪರ್ಯಾಪ್ತ ಮೇದಸ್ಸಿನ ಆಮ್ಲಗಳು (long-chain polyunsaturated fatty acids) ಮಗುವಿನ ಬೆಳವಣಿಗೆಗೆ ಅತ್ಯಗತ್ಯವಾಗಿದ್ದು, ಶಿಶುವಿನ ಮಿದುಳು, ನರಮಂಡಲ ಮತ್ತು ಅಕ್ಷಿಪಟಲಗಳ ಬೆಳವಣಿಗೆಯಲ್ಲಿ ಅತಿ ಮಹತ್ತರವಾದ ಪಾತ್ರವನ್ನು ಹೊಂದಿವೆ. ಸ್ವೀಡನಿನ ತಾಯಂದಿರಲ್ಲಿ ನಡೆಸಿದ ಅಧ್ಯಯನವೊಂದರಲ್ಲಿ, ಹಾಲಿನಲ್ಲಿರುವ ಅರಾಕ್ಡೋನಿಕ್ ಆಮ್ಲ ಮತ್ತು ಡೊಕೊಸಾಹೆಕ್ಸಾನೈಕ್ ಆಮ್ಲಗಳ ಅನುಪಾತವು ಶಿಶುಗಳ ಮಿದುಳಿನಲ್ಲಿರುವ ಈ ಆಮ್ಲಗಳ ಅನುಪಾತಕ್ಕೆ ಸಮಾನವಾಗಿದೆಯೆಂದೂ, ಮಗುವಿನ ಒಂದು ಹಾಗೂ ಮೂರನೇ ತಿಂಗಳಿನಲ್ಲಿ ತಲೆಯ ಹಾಗೂ ಮಿದುಳಿನ ಬೆಳವಣಿಗೆಯ ಗತಿಗೂ ಹಾಲಿನಲ್ಲಿ ಈ ಆಮ್ಲಗಳ ಪ್ರಮಾಣಕ್ಕೂ ನೇರವಾದ ಹೋಲಿಕೆಯಿದೆಯೆಂದೂ ಕಂಡುಬಂದಿದೆ.[Xiang M, 2000] ಜನನಾನಂತರದ ಆರಂಭದ ವಾರಗಳಲ್ಲಿ ತಾಯಿಯ ಹಾಲನ್ನು ಪಡೆದ ಮಕ್ಕಳು ಏಳೂವರೆಯಿಂದ ಎಂಟು ವರ್ಷ ವಯಸ್ಸಿನವರಾದಾಗ, ತಾಯಿಯ ಹಾಲನ್ನು ಪಡೆಯದ ಮಕ್ಕಳಿಗಿಂತ ಬಹಳಷ್ಟು ಹೆಚ್ಚಿನ ಬುದ್ದಿಮತ್ತೆಯನ್ನು ಹೊಂದಿರುತ್ತಾರೆಂದು ಅಧ್ಯಯನಗಳಲ್ಲಿ ವ್ಯಕ್ತವಾಗಿದೆ.[Lucas A, 1992; Morley R, 1988] ಬೇರೆಲ್ಲಾ ಅಂಶಗಳನ್ನು ಸರಿದೂಗಿಸಿದ ಬಳಿಕವೂ, ಕೃತಕ ಆಹಾರವನ್ನು ಪಡೆದ ಮಕ್ಕಳಿಗಿಂತ ಸ್ತನಪಾನವನ್ನು ಪಡೆದ ಮಕ್ಕಳ ಬೌದ್ಧಿಕ ಬೆಳವಣಿಗೆಯು ಸಾಕಷ್ಟು ಹೆಚ್ಚಿರುತ್ತದೆಯೆನ್ನುವುದನ್ನು ಹಲವು ಅಧ್ಯಯನಗಳು ತೋರಿಸಿವೆ.[Anderson JW, 1999; Uauy R, 1999]  ಕಲಿಕೆಯಲ್ಲಿ ಹಿಂದುಳಿಯುವ ಮಕ್ಕಳನ್ನು 'ಎಮ್ಮೆ ಹಾಲು ಕುಡಿದವನೋ?" ಎಂದೆಲ್ಲಾ ಮೇಷ್ಟ್ರುಗಳು ಗದರಿಸುತ್ತಿದ್ದುದರಲ್ಲಿ ನಿಜವಿತ್ತೇನೋ! ಮಧ್ಯಾಹ್ನದ ಬಿಸಿಯೂಟದ ಜತೆಯಲ್ಲಿ ಹಾಲನ್ನೇ ಕುಡಿಸಬೇಕೆಂದು ಕೆಲ ಸ್ಥಾಪಿತ ಹಿತಾಸಕ್ತಿಗಳು ಕೂಗಾಡುವುದೊಂದು ಷಡ್ಯಂತ್ರವಿರಬಹುದೇ?

ಹಾಲಿನ ಪ್ರೊಟೀನುಗಳನ್ನು ಫಾಸ್ಫರಸ್ ಯುಕ್ತ ಕೇಸೀನ್ ಗಳು ಮತ್ತು ಫಾಸ್ಫರಸ್ ಇಲ್ಲದ ವೇ ಪ್ರೊಟೀನುಗಳೆಂದು ಎರಡು ಗುಂಪುಗಳಲ್ಲಿ ವಿಭಜಿಸಬಹುದು. ಕೇಸೀನ್ ಗುಂಪಿನ ಪ್ರೊಟೀನುಗಳಲ್ಲಿ ಫಾಸ್ಫರಸ್ ಅಂಶವು ಹೆಚ್ಚಿರುವುದರಿಂದ ಇವು ಕ್ಯಾಲ್ಸಿಯಂನ ಜತೆಗೂಡಿ ಕ್ಯಾಲ್ಸಿಯಂ ಫಾಸ್ಫೇಟ್ ಸಂಯುಕ್ತಗಳಾಗಿರುತ್ತವೆ. ಫಾಸ್ಫರಸ್ ಪ್ರಮಾಣವು ಹೆಚ್ಚಿರುವುದರಿಂದಲೇ ಹಾಲಿನಲ್ಲಿ ಕ್ಯಾಲ್ಸಿಯಂ ಪ್ರಮಾಣವು ಕೂಡಾ ಹೆಚ್ಚಿರುತ್ತದೆ.[Milk Protein] ಮಾನವ ಹಾಲಿನಲ್ಲಿ ವೇ ಮತ್ತು ಕೇಸೀನ್ ಪ್ರೊಟೀನುಗಳ ಅನುಪಾತವು 70:30 ರಷ್ಟಿರುತ್ತದೆ.[Summary] ದನದ ಹಾಲಿನಲ್ಲಿ ಶೇ.82ರಷ್ಟು ಕೇಸೀನ್ ಆಗಿದ್ದು, ಕೇವಲ ಶೇ.18ರಷ್ಟು ಭಾಗವು ವೇ ಪ್ರೊಟೀನು ಆಗಿರುತ್ತದೆ. ಅಂದರೆ, ತಾಯಿಯ ಹಾಲಿನಲ್ಲಿರುವ ಕೇಸೀನ್ ಪ್ರಮಾಣವು ದನದ ಹಾಲಿನಲ್ಲಿರುವ ಕೇಸೀನ್ ಪ್ರಮಾಣದ ಅರ್ಧದಷ್ಟೂ ಇಲ್ಲ ಎಂದಾಯಿತು. ದನದ ಹಾಲಿನ ಮೂಲಕ ಅಷ್ಟೊಂದು ಅಧಿಕ ಪ್ರಮಾಣದಲ್ಲಿ ಕೇಸೀನ್ ಅನ್ನು ಸೇವಿಸುವುದರಿಂದಲೇ ಹಲವು ತರಹದ ಅಸಹಿಷ್ಣುತೆಗೆ (allergy) ಕಾರಣವಾಗುತ್ತದೆ.[Stengler M] ದನದ ಹಾಲಿನ ವೇ ಪ್ರೊಟೀನುಗಳಲ್ಲಿ ಶೇ.50ರಷ್ಟು β ಲ್ಯಾಕ್ಟೋಗ್ಲೋಬುಲಿನ್, ಶೇ.20ರಷ್ಟು α ಲ್ಯಾಕ್ಟಾಲ್ಬುಮಿನ್, ರಕ್ತ ದ್ರವದ ಆಲ್ಬುಮಿನ್, ಇಮ್ಯುನೋಗ್ಲಾಬುಲಿನ್ ಗಳು, ಲ್ಯಾಕ್ಟೊಫೆರಿನ್, ಟ್ರಾನ್ಸ್ಫೆರಿನ್  ಮತ್ತಿತರ ಹಲವಾರು ಸಣ್ಣ ಪ್ರೊಟೀನುಗಳು ಮತ್ತು ಕಿಣ್ವಗಳಿರುತ್ತವೆ. ಮಾನವ ಹಾಲಿನಲ್ಲಿ β ಲ್ಯಾಕ್ಟೋಗ್ಲೋಬುಲಿನ್ ಇರುವುದೇ ಇಲ್ಲ.[Milk Protein] ಪಶುಗಳ ಹಾಲಿನಲ್ಲಿರುವ ಇಂತಹಾ ಮನುಷ್ಯಸಹಜವಲ್ಲದ ಪ್ರೊಟೀನುಗಳು, ಅದರಲ್ಲೂ ಮುಖ್ಯವಾಗಿ ಕೇಸೀನ್ ಮತ್ತು ವೇ ಪ್ರೊಟೀನುಗಳ ವ್ಯತಿರಿಕ್ತವಾದ ಅನುಪಾತವು, ಮನುಷ್ಯರಲ್ಲಿ ವಿವಿಧ ರೀತಿಯ ಅಲರ್ಜಿ (ಅಸಹಿಷ್ಣುತೆ)ಗಳಿಗೆ ಕಾರಣವಾಗಿ ರೋಗಗಳನ್ನು ಉಂಟು ಮಾಡುತ್ತವೆ ಮತ್ತು ದನದ ಹಾಲಿನ ಅಲರ್ಜಿಯು ಮೊದಲ ವರ್ಷದ ಜೀವಿತಾವಧಿಯಲ್ಲಿ ಬಹಳ ಸಾಮಾನ್ಯವಾಗಿ ಕಂಡುಬರುತ್ತದೆ. [Docena GH, 1996; Høst A, 1994; Lara-Villoslada, 2000; Stengler M] ಮೊದಲ ವರ್ಷದಲ್ಲಿ ಶಿಶುವಿಗೆ ದನದ ಹಾಲನ್ನು ಕುಡಿಸುವುದರಿಂದ ಕರುಳಿನ ರಕ್ತಸ್ರಾವ ಮತ್ತು ಕಬ್ಬಿಣದ ಕೊರತೆಯಿಂದಾಗಿ ರಕ್ತಕೊರೆಯಂತಹ ವಿವಿಧ ತೊಂದರೆಗಳು ಕಂಡುಬರಬಹುದು. ಮೊದಲ ವರ್ಷದ ಬಳಿಕ ಪಶುವಿನ ಹಾಲನ್ನು ಕುಡಿಯುವುದರಿಂದ ಮಕ್ಕಳಲ್ಲಿ ಆಗಾಗ ಕಂಡುಬರುವ ಹೊಟ್ಟೆನೋವು, ರಕ್ತನಾಳಗಳ ಒಳಭಿತ್ತಿಯು ಪೆಡಸಾಗುವುದು, ಕಣ್ಣಿನ ಮಸೂರದ ಪರೆ, ಹಾಲಿನಿಂದ ಬರುವ ಸೋಂಕುರೋಗಗಳು ಮತ್ತು ಮಕ್ಕಳ ಅಪರಾಧೀ ಪ್ರವೃತ್ತಿ ಇವೇ ಮುಂತಾದ ತೊಂದರೆಗಳು ಉಂಟಾಗಬಹುದು.[Oski FA, 1985, Stengler M] ಅಷ್ಟೇ ಅಲ್ಲ, ಮೊಲೆಯುಣಿಸುತ್ತಿರುವ ತಾಯಿಯು ದನದ ಹಾಲನ್ನು ಕುಡಿಯುತ್ತಿದ್ದರೆ, ದನದ ಹಾಲಿನ ಪ್ರೊಟೀನುಗಳು ಆಕೆಯು ಸ್ರವಿಸುವ ಹಾಲಿನಲ್ಲಿ ಸೇರಿಕೊಂಡು ಮಗುವಿನಲ್ಲಿ ಗಂಭೀರ ಸ್ವರೂಪದ ಅಲರ್ಜಿಗೆ ಕಾರಣವಾಗಬಹುದು.[Lifschitz C, 1988]

ನಾವು ಕುಡಿದ ಹಾಲು ಮೊದಲಾಗಿ ನಮ್ಮ ಪಚನಾಂಗವನ್ನು ಸೇರುವುದರಿಂದ ಅದರ ಮೇಲೆಯೇ ಹಾಲಿನ ದುಷ್ಪರಿಣಾಮಗಳು ಅತ್ಯಧಿಕವಾಗಿರುತ್ತವೆ. ಬಾಯಿಯ ಹುಣ್ಣುಗಳಿಂದ ಹಿಡಿದು ಗಂಭೀರ ಸ್ವರೂಪದ ಕಾಹಿಲೆಗಳಾದ ಕರುಳಿನ ಉರಿಯೂತದಂತಹಾ ಹಲವು ತೊಂದರೆಗಳಿಗೆ ದನದ ಹಾಲು ಕಾರಣವಾಗಬಹುದು. ಈ ವರದಿಗಳನ್ನು ನೋಡಿ:

• ಪದೇ ಪದೇ ಬಾಯಿಯಲ್ಲಿ ಹುಣ್ಣುಗಳನ್ನು ಅನುಭವಿಸುವವರಲ್ಲಿ ಶೇ.25ರಿಂದ ಶೇ.75ರಷ್ಟು ಸಂದರ್ಭಗಳಲ್ಲಿ ದನದ ಹಾಲಿನ ವಿರುದ್ಧ ಪ್ರತಿಕಾಯ (antibodies) ಗಳನ್ನು ಗುರುತಿಸಲಾಗಿದೆ.[Earl BJ, 1989; Woo SB, 1996]

•  ಕೃತಕ ಶಿಶು ಆಹಾರವನ್ನು ತಿನ್ನುವ ಶಿಶುಗಳಲ್ಲಿ ದನದ ವೇ ಪ್ರೊಟೀನು ಉದರ ಹಿಂಡುವ ಯಾತನೆಯನ್ನು ಉಂಟುಮಾಡಬಲ್ಲದೆಂದು ಗುರುತಿಸಲಾಗಿದೆ. [Lothe L, 1989]

• ಮೊಲೆಯುಣಿಸುತ್ತಿರುವ ತಾಯಿಯು ದನದ ಹಾಲನ್ನು ಕುಡಿಯುತ್ತಿದ್ದರೆ, ದನದ ಹಾಲಿನ ಪ್ರೊಟೀನುಗಳು ಆಕೆಯ ಹಾಲಿನಲ್ಲಿಯೂ ಸ್ರವಿಸಲ್ಪಟ್ಟು ಮಗುವಿನ ಉದರ ಶೂಲೆಗೆ ಕಾರಣವಾಗಬಹುದು ಮತ್ತು ತಾಯಿಯು ದನದ ಹಾಲಿನ ಸೇವನೆಯನ್ನು ನಿಲ್ಲಿಸಿದಾಗ ಶಿಶುವಿನ ಉದರ ಶೂಲೆಯೂ ಶಮನಗೊಳ್ಳುತ್ತದೆ.[Jakobsson I, 1978]

• ಒಂದು ವರ್ಷಕ್ಕಿಂತ ಕಿರಿಯ ಮಕ್ಕಳಿಂದ ಹಿಡಿದು ಬೆಳೆಯುತ್ತಿರುವ ಮಕ್ಕಳಲ್ಲಿ ಕಂಡುಬರುವ ಜಠರದಿಂದ ಅನ್ನನಾಳಕ್ಕೆ ಪಶ್ಚವಹನವಾಗುವ (Gastroesophageal reflux) ಸಮಸ್ಯೆಯು ದನದ ಹಾಲಿನ ಅಲರ್ಜಿಗೆ ಸಂಬಂಧಿಸಿದ್ದಾಗಿರಬಹುದು.[Forget P, 1985; Iacono G, 1996; Nielsen RG, 2004; Salvatore S, 2002]

• ದನದ ಹಾಲಿನ ಅಸಹಿಷ್ಣುತೆಯಿಂದಾಗಿ ಜಠರ ಮತ್ತು ಮುಂಗರುಳುಗಳ ಉರಿಯೂತವುಂಟಾಗಿ, ಅದೃಶ್ಯವಾದ ರಕ್ತಸ್ರಾವವೂ, ಅದರಿಂದಾಗಿ ರಕ್ತಕೊರೆಯೂ ಸಂಭವಿಸಬಹುದು [Coello-Ramirez P, 1984] ಮತ್ತು ಜಠರದ ಕೆಲಸಕ್ಕೆ ವ್ಯತ್ಯಯವುಂಟಾಗಿ ಆಹಾರದ ಹೀರುವಿಕೆಗೆ ತೊಂದರೆಯಾಗಬಹುದು.[Kokkonen J, 1979]

• ಮಕ್ಕಳಲ್ಲಿ ದನದ ಹಾಲಿನ ಪ್ರೊಟೀನುಗಳಿಂದ ಕರುಳಿನ ಉರಿಯೂತವುಂಟಾಗಬಹುದು[Kokkonen J, 2001] ಮತ್ತು ಇದರಿಂದಾಗಿ ಗುದನಾಳದಿಂದ ರಕ್ತಸ್ರಾವ ಹಾಗೂ ಕರುಳಿನಿಂದ ಅದೃಶ್ಯ ರಕ್ತಸ್ರಾವದಿಂದಾಗಿ ತೀವ್ರ ಸ್ವರೂಪದ ರಕ್ತಕೊರೆಯು ದೊಡ್ದ ವಯಸ್ಸಿನ ಮಕ್ಕಳಲ್ಲಿಯೂ ಉಂಟಾಗಬಹುದು.[Willetts IE, 1999]

• ದನದ ಹಾಲಿನ ಸೇವನೆಯಿಂದ ವಾಂತಿ ಮತ್ತು/ಯಾ ಬೇಧಿಗಳುಂಟಾಗಿ ಬದುಕುವುದೇ ದುಸ್ತರವೆನಿಸಿದ್ದ ಮಕ್ಕಳಲ್ಲಿ ಆಹಾರದ ಬದಲಾವಣೆಯಿಂದ ಆರೋಗ್ಯದಲ್ಲಿ ಸುಧಾರಣೆಯಾದುದನ್ನು ವರದಿ ಮಾಡಲಾಗಿದೆ.[Vitoria JC, 1979]

• ಸಣ್ಣ ಮಕ್ಕಳಲ್ಲಿ ದನದ ಹಾಲಿನ ಅಸಹಿಷ್ಣುತೆಯು ದೀರ್ಘಕಾಲದ ಮಲಬದ್ಧತೆಗೂ ಕಾರಣವಾಗಬಹುದು.[Iacono G, 1998]

• ದನದ ಹಾಲಿನ ಅಸಹಿಷ್ಣುತೆಗೂ ದೊಡ್ದ ಕರುಳಿನ ಉರಿಯೂತಕ್ಕೂ ಸಂಬಂಧವಿದೆಯೆಂದು ಹಲವು ಅಧ್ಯಯನಗಳು ತೋರಿಸಿವೆ.[Glassman MS, 1990; Knoflach P, 1987; Pittschieler K, 1990; Samuelsson SM, 1991; Taylor KB, 1961; Truelove SC, 1961] ಸಾಮಾನ್ಯರಿಗೆ ಹೋಲಿಸಿದರೆ, ಕರುಳಿನ ಉರಿಯೂತವಿರುವವರಲ್ಲಿ ದನದ ಹಾಲಿನ ಪ್ರೊಟೀನುಗಳ ವಿರುದ್ಧವಾದ ಪ್ರತಿಕಾಯಗಳ ಪ್ರಮಾಣವು ಸಾಕಷ್ಟು ಹೆಚ್ಚಿರುವುದನ್ನು ಗುರುತಿಸಲಾಗಿದೆ  [Knoflach P, 1987; Taylor KB, 1961] ಹಾಗೂ ದೊಡ್ದ ಕರುಳಿನ ವೃಣರೂಪಿ ಉರಿಯೂತವಿರುವವರು ಹಾಲನ್ನು ಸೇವಿಸುವುದರಿಂದ ರೋಗಲಕ್ಷಣಗಳು ಉಲ್ಬಣಿಸಬಹುದು.[Samuelsson SM, 1991; Truelove SC, 1961] ತಾಯಿಯ ಹಾಲಿನಲ್ಲಿ ಸ್ರವಿಸಲ್ಪಟ್ಟ ದನದ ಹಾಲಿನ ಪ್ರೊಟೀನುಗಳಿಂದಾಗಿ ಮೂರು ತಿಂಗಳ ಹುಡುಗನೊಬ್ಬನಲ್ಲಿ ತೀವ್ರ ಸ್ವರೂಪದ ದೊಡ್ಡ ಕರುಳಿನ ಉರಿಯೂತ ಮತ್ತು ಅದರಿಂದಾಗಿ ರಕ್ತಬೇಧಿಯಾದ ವರದಿಯಿದೆ.[Pittschieler K, 1990]

• ದನದ ಹಾಲಿನಲ್ಲಿರುವ ಮೈಕೋಬ್ಯಾಕ್ಟೀರಿಯಂ ಪಾರಾಟುಬರ್ಕ್ಯುಲೋಸಿಸ್ ನಂತಹ ಸೂಕ್ಷ್ಮಾಣುಗಳಿಂದಾಗಿ ಕರುಳಿನ ರೋಧಶಕ್ತಿಯು ಕುಗ್ಗಿ ಕ್ರಾನ್ಸನ ಕಾಹಿಲೆಯಂತಹ ಕರುಳಿನ ಉರಿಯೂತಕ್ಕೆ ಕಾರಣವಾಗಬಹುದೆಂದು ಇತ್ತೀಚಿನ ಅಧ್ಯಯನಗಳು ಸೂಚಿಸುತ್ತವೆ. [Mpofu CM, 2007]

• ಹಾಲಿನ ಸೇವನೆಗೂ, ಕರುಳಿನ ಅಸಹನೆಗೂ (irritable bowel syndrome) ಸಂಬಂಧವಿರಬಹುದೆನ್ನುವ ವರದಿಗಳೂ ಸಾಕಷ್ಟಿವೆ.[Niec AM, 1998; Vernia P, 1995; Vernia P, 2001; Vernia P, 2004]

ದನದ ಹಾಲು ಮತ್ತು ಅದಕ್ಕೆ ಅಲರ್ಜಿಯು ಶ್ವಾಸಾಂಗದ ಹಲವಾರು ಕಾಹಿಲೆಗಳಿಗೆ ಕಾರಣವಾಗಬಹುದು:

• ಶಿಶುಗಳಲ್ಲಿ ವರದಿಯಾಗಿರುವ 'ಹೀನರ'ನ ಕಾಹಿಲೆಗೆ [Heiner syndrome] ದನದ ಹಾಲಿನ ಸೇವನೆಯೇ ಮುಖ್ಯವಾದ ಕಾರಣವಾಗಿದೆ. ಕೆಮ್ಮು, ದಮ್ಮು, ಕಫದಲ್ಲಿ ರಕ್ತ, ಮೂಗು ಮುಚ್ಚುವುದು, ಶ್ವಾಸೋಛ್ವಾಸಕ್ಕೆ ತೊಂದರೆಯಾಗುವುದು, ಆಗಾಗ ಕಿವಿಗಳಲ್ಲಿ ಸೋಂಕುಂಟಾಗುವುದು, ಹಸಿವಿಲ್ಲದಿರುವುದು, ವಾಂತಿ, ಬೇಧಿ, ಹೊಟ್ಟೆನೋವು, ಮಲದಲ್ಲಿ ರಕ್ತಸ್ರಾವ ಮತ್ತು ಬೆಳವಣಿಗೆಯು ಕುಂಠಿತಗೊಳ್ಳುವುದು ಈ ತೊಂದರೆಯ ವಿವಿಧ ಲಕ್ಷಣಗಳಾಗಿವೆ. ಈ ಮಕ್ಕಳ ಎದೆಯ ಕ್ಷ-ಕಿರಣ ಪರೀಕ್ಷೆಯಲ್ಲಿಯೂ ನಿರ್ದಿಷ್ಟವಾದ ತೊಂದರೆಗಳು ಕಂಡುಬರುತ್ತವೆ. ದನದ ಹಾಲಿನ ಪ್ರೊಟೀನುಗಳಿಗೆ ವಿರುದ್ಧವಾದ ಪ್ರತಿಕಾಯಗಳು ಈ ಮಕ್ಕಳಲ್ಲಿ ಬಹಳಷ್ಟು ಹೆಚ್ಚಿನ ಪ್ರಮಾಣದಲ್ಲಿರುತ್ತವೆ. ಹಾಲಿನ ಸೇವನೆಯನ್ನು ಸಂಪೂರ್ಣವಾಗಿ ನಿಲ್ಲಿಸಿದ ಕೆಲವೇ ದಿನಗಳಲ್ಲಿ ರೋಗಲಕ್ಷಣಗಳು ವಾಸಿಯಾಗಿ, ಕೆಲವೇ ವಾರಗಳಲ್ಲಿ ಕ್ಷ-ಕಿರಣ ಪರೀಕ್ಷೆಯಲ್ಲಿ ಗೋಚರಿಸಿದ ತೊಂದರೆಗಳೂ ಮಾಯವಾಗುತ್ತವೆ.[Moissidis et al, 2005]

• ದನದ ಹಾಲಿನಿಂದ ತಯಾರಿಸಿದ ಶಿಶು ಆಹಾರವನ್ನು ಸೇವಿಸದಿದ್ದರೆ ಮೊದಲ ವರ್ಷದಲ್ಲಿ ಅಸ್ತಮಾ ಯಾ ಉಬ್ಬಸದಿಂದ ಬಳಲುವ ಸಾಧ್ಯತೆಗಳು ಕಡಿಮೆಯಾಗುತ್ತವೆ [Ram FSF]ಹಾಗೂ ಸ್ತನಪಾನ ಮಾಡಿದ ಮಕ್ಕಳನ್ನು ಮೊದಲ ಐದು ವರ್ಷಗಳ ಕಾಲ ಅಧ್ಯಯನ ಮಾಡಿದಾಗ ಅವರಲ್ಲಿ  ಎಲ್ಲಾ ವಿಧದ ಅಸಹಿಷ್ಣುತೆಯ ತೊಂದರೆಗಳು ಕಡಿಮೆಯಿರುವುದು ಕಂಡುಬಂದಿದೆ.[Chandra RK, 1997]

• ಶೈಶವದಲ್ಲಿ ದನದ ಹಾಲಿನ ಅಸಹಿಷ್ಣುತೆಯನ್ನು ಹೊಂದಿದ್ದ ಮಕ್ಕಳಲ್ಲಿ ಪದೇ ಪದೇ ಕಿವಿಯ ಸೋಂಕುಂಟಾಗುವ ಸಾಧ್ಯತೆಗಳು ಹೆಚ್ಚಿರುತ್ತವೆ ಮತ್ತು ಅದರ ಜೊತೆಗೆ ಶ್ವಾಸಕೋಶಗಳಲ್ಲಿಯೂ ತೊಂದರೆಗಳುಂಟಾಗಬಹುದು.[Juntti H, 1999]

• ದನದ ಹಾಲಿನ ಮೇದಸ್ಸುಗಳು ಅಸ್ತಮಾ ರೋಗಿಗಳ ಶ್ವಾಸಕೋಶಗಳಲ್ಲಿ ಅನಿಲಗಳ ವಿನಿಮಯಕ್ಕೆ ಅಡ್ಡಿಯನ್ನುಂಟುಮಾಡಬಹುದು ಎಂಬ ವರದಿಗಳಿವೆ.[Haas F, 1991]

ಇಲ್ಲಿಗೆ ಮುಗಿಯಿತೇ? ಇಲ್ಲ, ಇನ್ನೂ ಬಹಳಷ್ಟಿದೆ! ಮೊದಲನೇ ವಿಧದ ಮಧುಮೇಹ, ಕ್ಯಾನ್ಸರ್ ಗಳು ಇವೇ ಮುಂತಾದ ಗಂಭೀರ ಸ್ವರೂಪದ ಸಮಸ್ಯೆಗಳಿಗೂ ದನದ ಹಾಲಿನ ಸೇವನೆಯು ಕಾರಣವಾಗಿರಬಹುದೆಂದು ಅಧ್ಯಯನಗಳು ಸೂಚಿಸುತ್ತವೆ. ಆರಂಭದ ದಿನಗಳಲ್ಲಿ ದನದ ಹಾಲನ್ನು ಸೇವಿಸುವುದರಿಂದ ಮೇದೋಜೀರಕಾಂಗದ ಬೀಟಾ ಕಣಗಳು ನಾಶ ಹೊಂದಿ ಮೊದಲನೇ ವಿಧದ ಮಧುಮೇಹಕ್ಕೆ ಕಾರಣವಾಗಬಹುದೆಂದು ಹಲವಾರು ವರದಿಗಳು ಪ್ರಕಟಗೊಂಡಿವೆ:

ಮೊದಲ ಆರು ತಿಂಗಳುಗಳಲ್ಲಿ ಮಗುವಿನ ಕರುಳಿನೊಳಗೆ ಸೇರಿದ್ದೆಲ್ಲವೂ ಸುಲಭವಾಗಿ ಹೀರಲ್ಪಡುವುದರಿಂದ, ಆ ವಯಸ್ಸಿನಲ್ಲಿ ಪ್ರಾಣಿಗಳ ಹಾಲನ್ನು ಮಗುವಿಗೆ ನೀಡುವುದರಿಂದ ಅದು ಸುಲಭವಾಗಿ ಹೀರಲ್ಪಟ್ಟು ಅದರ ಪ್ರೊಟೀನುಗಳಿಂದಾಗಿ ಮಧುಮೇಹದಂತಹ ಹಲವು ತೊಂದರೆಗಳಿಗೆ ಕಾರಣವಾಗುತ್ತದೆ.

• ಹಾಲಿನ ಪ್ರೊಟೀನುಗಳ ಸೇವನೆಗೂ, ಮೊದಲನೇ ವಿಧದ ಮಧುಮೇಹದ ಆಪತನಕ್ಕೂ ನೇರವಾದ ಸಂಬಂಧವಿದೆಯೆಂದು ಹಲವಾರು ಅಧ್ಯಯನಗಳು ತೋರಿಸಿವೆ. ಇದಕ್ಕೆ ವಿರುದ್ಧವಾಗಿ, ತಾಯಿಯ ಹಾಲನ್ನು ಮಾತ್ರವೇ ಕುಡಿದ ಮಕ್ಕಳಲ್ಲಿ ಈ ತೊಂದರೆಯು ಕಡಿಮೆಯಿರುವುದು ಕೂಡಾ ಕಂಡುಬಂದಿದೆ.[Scott FW, 1998]

• ಫಿನ್ಲಾಂಡಿನಲ್ಲಿ ಮಕ್ಕಳ ಮಧುಮೇಹದ ಕುರಿತು ನಡೆಸಿದ ಅಧ್ಯಯನವು ಹೊಸದಾಗಿ ಮಧುಮೇಹಕ್ಕೆ ತುತ್ತಾದ 697 ಮಕ್ಕಳು, ಕಾಹಿಲೆಯಿಲ್ಲದ 415 ಸಹೋದರ ಮಕ್ಕಳು ಮತ್ತು 86ರಷ್ಟು ವಯಸ್ಸು ಮತ್ತು ಲಿಂಗಸಾಮ್ಯತೆಯಿರುವ ಮಕ್ಕಳನ್ನು ಒಳಗೊಂಡಿದ್ದು, ಶೈಶವಾವಸ್ಥೆಯಲ್ಲಿ ಅವರ ಆಹಾರಕ್ರಮ, ಹಾಲಿನ ಸೇವನೆ ಮತ್ತು ಅವರ ರಕ್ತದಲ್ಲಿ ದನದ ಹಾಲಿಗೆ ವಿರುದ್ಧವಾದ ಪ್ರತಿಕಾಯಗಳನ್ನು ಮತ್ತು ಅವುಗಳ ನಡುವಿನ ಸಂಬಂಧಗಳನ್ನು ಅದರ&